വേനലിന്റെ കനൽ ചൂടിലും റമളാനിലെ ദീർഘ ഉപവാസത്തിലും ശരീരത്തിൽ ഊർജ്ജം കുറയുമ്പോൾ, അതിവേഗം തണുപ്പിനെയും ഉണർവിനെയും തേടുകയാണ് പലരുടെയും പതിവ്. ഇതിന് ഏറ്റവും കൂടുതൽ തിരഞ്ഞെടുക്കപ്പെടുന്ന ഒരു വഴിയാണ് ഫുൾ ജാർ സോഡ. കുപ്പി തുറക്കുമ്പോൾ കേൾക്കുന്ന ശബ്ദം മുതൽ കാഴ്ചയും രുചിയും വരെ സോഡയുടെ അനുഭവം ആവേശകരമാണെന്ന് തീർച്ച. പ്രത്യേകിച്ചും രാത്രി സുഹൃത്തുക്കളോടൊത്ത് സമയം ചിലവഴിക്കുമ്പോൾ ഈ ശീതള പാനീയത്തിന്റെ ആവശ്യം ഇരട്ടിയാകാറുണ്ട്. എന്നാൽ, ഈ താൽക്കാലിക ഉണർവിന് പിന്നിൽ ആരോഗ്യത്തിന് ദോഷകരമായ നിരവധി കാര്യങ്ങളുണ്ട്.
സോഡ ആകട്ടേ, അതിനൊപ്പം ഉപ്പിലിട്ടതും ചേർന്നാൽ ദീർഘകാലം ആരോഗ്യത്തിന് പ്രതികൂലമായ ഫലങ്ങൾ ഉണ്ടാക്കാം. അമിതമായ സോഡ ഉപയോഗം അസിഡിറ്റി, ദഹനമില്ലായ്മ എന്നിവയ്ക്കു കാരണമാകാം. ഒരു ദീർഘദിന ഉപവാസശേഷം ഒരുമിച്ച് ഇവയെല്ലാം കൂടെ കഴിക്കുമ്പോൾ ദഹനപ്രക്രിയയെ ബാധിച്ച് വയറിലെ അസിഡിറ്റി കൂടുതലാകാനും ദഹനസംബന്ധിയായ അസ്വസ്ഥതകൾ ഉണ്ടാകാനും സാധ്യതയുണ്ട്. കൂടാതെ, അമിതമായ ഉപ്പും പഞ്ചസാരയും രക്തസമ്മർദ്ദം ഉയർത്താൻ കാരണമാകാം. ഇതിന്റെ സ്ഥിരമായ ഉപയോഗം വൃക്കകളെയും ഹൃദയത്തെയും ബാധിക്കാം.
ഇതിനു പകരം പ്രകൃതിദത്തമായ ശീതളപാനീയങ്ങൾ ആയ തേങ്ങവെള്ളം, ഇളനീർ , സംഭാരം എന്നിവ ഉപയോഗിക്കുന്നത് ശരീരത്തിന് കൂടുതൽ അനുയോജ്യമാണ്. ഈ പാനീയങ്ങൾ ശരീരത്തിന് ആവശ്യമുള്ള ഉണർവ് നൽകുന്നതിനൊപ്പം ദഹനപ്രക്രിയയ്ക്കും താപനില നിയന്ത്രണത്തിനും സഹായകമാകുന്നു. അതുപോലെ, കാർബണേറ്റഡ് പാനീയങ്ങൾ നിയന്ത്രിതമായി മാത്രം ഉപയോഗിക്കുകയും അതിന്റെ അളവ് കുറയ്ക്കുകയും ചെയ്യുന്നത് ആരോഗ്യത്തിന് വളരെ ഉചിതമായ തീരുമാനമായിരിക്കും.
"ഫുൾ ചാർജാവാൻ, ഫുൾ ജാർ സോഡ!" എന്നത് ഒരു ആവേശകരമായ അനുഭവം തന്നെയാണ്. എന്നാൽ, ഈ ഉണർവിന് പിന്നിലെ ദീർഘകാല ആരോഗ്യപ്രശ്നങ്ങൾ മനസ്സിലാക്കി, ആസ്വാദനത്തിനും ആരോഗ്യത്തിനുമിടയിൽ ഒരു സമതുലനം കണ്ടെത്തുക. മനസ്സിന് തണുപ്പും ശരീരത്തിന് ഉണർവുമാകണമെങ്കിൽ ശരീരത്തിന് യഥാർത്ഥത്തിൽ ആവശ്യമായതെന്താണെന്ന് ചിന്തിച്ചു തീരുമാനിക്കേണ്ടതുണ്ട്.
Comments